Real Madridi është i përgatitur për të dëgjuar këtë verë ofertat për mesfushorin Isco.

Trajneri i ‘Los Blancos’, Zinedine Zidane pritet të bëjë ndryshime në përgjithësi në skuadrën e tij këtë verë pasi gjiganti spanjoll përfundoi një sezon të vështirë, transmeton portali arbresh.info.

Përveç eliminimit tronditës në fazën e 1/8-ës në Ligë të Kampionëve, Real Madridi përfundoi në vendin e tretë në La Liga me 19 pikë prapa kampiones – Barcelonës.

Marca tani pretendon se Isco mund të jetë njëri nga viktimat e sezonit të dobët të klubit ndërkohë që edhe lojtarët e tjerë si Gareth Bale dhe Jamez Rodriguez pritet gjithashtu të largohen.

Edhe pse besohet se reprezentuesi spanjoll nuk ka ndërmend të largohet, gazeta e lartpërmendur spanjolle pretendon se anëtarët e hierarkisë së klubit e kanë vënë atë në dispozicion për shitje.

Thuhet se 27-vjeçari synon qëndrimin në Real Madrid dhe te kryeqyteti spanjoll për shkak se është aktualisht duke pritur një bebe me të dashurën e tij Sara Salamo.

Isco përfundoi sezonin aktual me gjashtë gola dhe vetëm një asistim brenda 37 paraqitjeve në të gjitha kompeticionet./arbresh.info/